INTERNATIONAL CHILD DEVELOPMENT CENTER “They may forget what you said but they will never forget how you made them feel” Carol Buchner
Աուտիզմի իրազեկման միջազգային օրվա կապակցությամբ Երեւանում տեղի ունեցավ քայլարշավ, որը կազմակերպել էին «Աուտիզմ ազգային հիմնադրամը»՝ ՀՀ առաջին տիկին Ռիտա Սարգսյանի նախագահությամբ եւ քաղաքապետարանի եւ ՄԱԿ-ի մանկական հիմնադրամի աջակցությամբ։
Քայլարշավին մասնակցում էին ներառական դպրոցների աշակերտներ, ուսուցիչներ, աուտիզմ ունեցող երեխաներ, ծնողներ։
«Ակցիայի հիմնական նպատակն է ցույց տալ, որ մեր երեխաները հոգատարությամբ են վերաբերվում իրենց հասակակիցներին, ովքեր սահմանափակ կարողություններ ունեն», – ասաց քաղաքապետարանի հանրակրթության վարչության պետ Գայանե Սողոմոնյանը:
«Մեր դասարանում կա աուտիզմով երեխա։ Նա սովորում է որոշ մեր դասարանցիներից ավելի լավ», – NEWS.am Medicine-ի թղթակցին ասաց ակցիայի մասնակից երեխաներից մեկը։
«Աուտիզմը հիվանդություն չէ, դա ապրելակերպ է, հոգու տեսակ է։ Եթե մենք դա հասկանալով ջարդենք այն պատը, որը մեզ այդ երեխաներից տարանջատում է, նրանք անպայման կգտնեն իրենց տեղը մեր հասարակության մեջ», – լրագրողների հետ զրույցում ասաց ՀՀ առաջին տիկին Ռիտա Սարգսյանը։
Ազատության հրապարակում, որտեղ ավարտվեց քայլարշավը, տեղի ունեցավ «Երեխաների զարգացման միջազգային կենտրոնի» սաների նկարների եւ այլ աշխատանքների բացօթյա ցուցահանդես, իսկ Ինգա եւ Անուշ Արշակյանները կատարեցին աուտիզմ ունեցող երեխաներին նվիրված մի երգ։
«Աուտիկ երեխաները կոչվում են Աստծո հրեշտակներ», – ասաց Ռիտա Սարգսյանը, իսկ հաղորդավար Ավետ Բարսեղյանը, ով երգի բառերի հեղինակն է, ավելացրեց, որ երգը հենց այդպես էլ կոչվում է՝ «Աստծո հրեշտակներ»։
Աղբյուրը՝ http://med.news.am
